【同你一齊行・由上環地鐵站A1出口去到Modern Times實時記錄 FROM SHEUNG WAN MTR EXIT A1 TO MODERN TIMES HK】

本年度Modern Times Summer Market，今次命名為 “2ND TIME”，真係好鍾意呢個名，令我諗起The Stone Roses 1994年推出嘅大碟 “Second Coming”，講起呢隻碟，大家一定要聽吓，真係石破天驚，原本想將隻碟入面嘅歌放落呢條片度，但唔係好夾，下次再介紹俾大家。

言歸正傳，因為有幾位客人見到我哋關於Summer Market嘅介紹想嚟參觀，但係上環區佢哋比較少嚟，就問我哋應該點行。

諗諗吓不如拍條片，如實記錄由上環地鐵站A1出口，行到嚟Modern Times嘅整個過程，大約兩三分鐘就到。

原本想加二倍速，不過真實嘅距離感好重要，所以無加速，等大家感受吓 。如果想快鏡，㩒住你嘅右手邊就可以變成二倍速了。

由上環店A1出嚟到Modern Times真係好簡單，基本上，就係上咗地面向左行，之後過兩個紅綠燈，見到7-Eleven同龍記茶餐廳，隔離就見到我哋身處嘅余氏大廈嘅入口了。

大廈係無地面Lift的，要行二十六級樓梯，就會見到一樓管理處，呢個位係關鍵，面向管理處轉右就係升降機大堂，轉左就直上樓梯。

唔知點解，呢個位嘅設計係令人好自然就行咗樓梯，可能個升降機大堂大隱閉，神秘到唔存在咁 。所以好多第一次嚟嘅客人，都以為呢度無升降機。

跟住搭Lift㩒3字就Ok，打開門，會見到塊牌寫住四樓，不過唔使理佢，見到Modern Times個名就啱了。

呢度一梯兩伙，我哋隔離係詠春尹師傅，成日有外國人嚟學功夫，我覺得極有風味，好開心有呢位鄰居。

📍 MODERN TIMES STANDARD LIFE STORE

香港上環德輔道中306號余氏大廈3/F 306室

Unit 306, 3/F, 306 Des Voeux Road Central, Sheung Wan, Hong Kong.