【MODERN TIMES TRAVEL GUIDE 11・#放假忙過開工－定休日日誌2023年6月20日】
小學學校旅行，六年入面，有四年都係去甲龍，個個同學聽到甲龍就呼天搶地，我就無乜所謂，反正都係去玩。而家你問我甲龍喺邊，我根本無概念，因為當時都係喺學校搭旅遊巴士來回，細路又點會理呢啲嘢。
估唔到，幾十年後我又返嚟甲龍，為了一探這間農場鮮奶有限公司。原來係喺八鄉同石崗一帶，沿途覺得越行越唔對路，直情有去日本搵舖頭嘅感覺。通常咁嘅情況，經驗話俾我知，越唔對路，越要繼續行，咁就啱㗎喇 (不過都失敗過好多次)。 一路都無乜人，一入到呢度，勁多人喺度食嘢，啲細路跑嚟跑去，又有幾隻羊喺度叫，真係嚇一跳。原來可以買啲草嚟餵羊，所以啲羊見到有人攞住啲草行埋嚟好興奮。 餐蛋麵、燉蛋白、薑汁撞奶全部好味，估佢唔到。餐蛋麵咁樣就得㗎喇，唔好加生菜，唔會因為條菜健康咗㗎。
農場鮮奶有限公司 Farm Milk Co. Ltd. 香港元朗石崗甲龍村雷公田78號 78 Lui Kung Tin, Kap Lung Village, Yuen Long, Hong Kong.